a) Maatskaplike ondersteuning aan die individu en gemeenskap

Helpende Hand fokus op die hart van die individu en gemeenskappe en vra die volgende vraag: “Hoe gaan dit met die Afrikaner-individu en -gemeenskap se gemoed, sieninge en denke?” Helpende Hand dryf die individu en gemeenskappe om hul egokragte en wilsbeweging (die eie wil om verandering/beweging teweeg te bring) tot aksie te laat oorgaan, sodat hulle hul volle potensiaal as individue binne ’n gemeenskap kan bereik.

b) Vir die gemeenskap, deur die gemeenskap

Solidariteit Helpende Hand glo dat die individu nooit ’n losstaande entiteit is nie en dat gemeenskapsgeborgenheid noodsaaklik is. Dit is egter nie noodwendig vir ’n gemeenskap moontlik om op alle vlakke geborgenheid te ervaar nie, en daarom bied SHH fisiese, sosio-emosionele, kulturele en geestelike ondersteuning aan die gemeenskap deur die gemeenskap, deur maatskaplikgebaseerde gemeenskapsontwikkeling.

c) Fokus op die ontwikkeling/opheffing/opleiding van gemeenskapslede

Solidariteit Helpende Hand is oortuig daarvan dat basiese opleiding en ontwikkeling aan individue binne hul gemeenskappe gebied moet word. Hierdie basiese maar kritiese opleiding en ontwikkeling is nodig om mense te bemagtig. Indien ’n persoon bemagtig of tot wilsbeweging gebring kan word, kan die persoon meer suksesvol begelei word om oplossings vir hul huidige uitdagende lewensituasies te vind. Ons is oortuig dat opleiding en ontwikkeling van die mens die belangrikste sleutel tot volhoubaarheid en selfstandigheid is.

Dit is die wyse waarop gesonde gemeenskappe geskep word, waar gemeenskapslede met geleenthede en hoop toegerus kan word, waar selfversorging ’n werklikheid gemaak kan word en waar werksekerheid bevorder kan word.

1. Werwing van passievolle ondersteuners, verdere stigting van en ondersteuning aan nuwe en bestaande takke en dorpsverteenwoordigers;

2. Bou van netwerkvennote en hulpbron-ontginning tot voordeel van die onderskeie gemeenskappe;

3. Fondswerwing;

4. Samewerking en ondersteuning aan maatskaplike werkers om uitvoering van ondersteuningsprogramme in gemeenskappe te bewerkstellig;

5. Bevordering en versterking van gemeenskapstudiefondse; en

6. Die skep van HOOP en ’n TOEKOMS deur die gemeenskapstrukture.

Solidariteit Helpende Hand begrond sy werksaamhede vanuit ’n Christelike perspektief en beginsels, waar die individu in sy gemeenskap herken word. Die balans tussen die individue en die groep is uiters belangrik. Christene verstaan dat die groep en die individu nie in stryd met mekaar is nie. Die uniekheid van elke mens word, volgens ’n godsbeeld, erken. Individue het hul eie naam, eie persoonlikheid, aard, ruimte, talente en gawes, wat nie in stryd met mekaar is nie. Die mens word eerstens geskep om ’n band met God te hê en tweedens met ander. Dus bestaan daar ’n begrip dat die mens geskep word om sy gawes aan te wend om ander (hul gemeenskap) te dien. Die siening beklemtoon die begrip dat die individue ook verantwoordelikheid moet neem om na mekaar om te sien, wat die gemeenskapsgedagte is.

Hierdie Christelike perspektief en beginsels waarop Solidariteit Helpende Hand begrond is, kan soos volg saamgevat word:

a) Elke mens is uniek, geskape na God se beeld en word geroep in God se koninkryk.

b) Hierdie roeping is nie individualisties of sosialisties nie, maar dui op ’n verbondenheid aan God en aan mekaar.

c) Daarom is dit nodig dat elke individu, gemeenskap en gemeenskapsontwikkelingsplan die eer van God voorop stel.

d) Om die eer van God voorop te stel, beteken dat almal binne hul vermoë en gawes maksimale potensiaal bereik.

’n Roepingsgedrewe personeellid, maatskaplike werker of streeksorganiseerder se rol is dus om die balans in die samelewing tussen die individu en die gemeenskap te fasiliteer, om optimale funksionering van die individu binne sy/haar unieke gemeenskap te bewerkstellig, sodat die individu en die gemeenskap ’n totale verbondsgemeenskap kan wees, tot eer van God, tot versterking van mekaar en tot doelgerigte gemeenskapsontwikkeling.

Solidariteit Helpende Hand se strategie sluit die vestiging van selfstandige ankergemeenskappe in, waar gemeenskapslede se welstand deur fisiese, sosio-emosionele, kulturele en geestelike ondersteuning bevorder sal word sodat hulle vry, veilig en voorspoedig kan leef.

Solidariteit Helpende Hand gaan binne die ankergemeenskapstrategie toesien dat die volgende organisasies/instansies/dienste vir gemeenskapslede beskikbaar is, maar dit sal nie noodwendig deur Solidariteit Helpende Hand bestuur of gestig word nie.

Kerke

Tehuise vir ouer persone

Tehuise vir die versorging van persone wat leef met gestremdhede

Maatskaplike statutêre organisasie

Kliniek – gesinsbeplanning en versorging

Skole en kleuterskole

Daar word wel beoog om in elke ankergemeenskap ’n gemeenskapsentrum te vestig. ’n Gemeenskapsentrum is ’n gebou of ’n terrein wat hoofsaaklik gebruik word vir gemeenskapsdienste of aktiwiteite wat die fisiese, sosio-emosionele, kulturele en geestelike ondersteuning van persone binne die gemeenskap bevorder.

’n Gemeenskapsentrum is die plek en hulpbron waar:

a) inwoners kan ontmoet, veilige en aangename aktiwiteite kan bywoon of dit self kan organiseer;

b) die gemeenskapsinteraksie bydra tot die ontwikkeling van 'n vriendelike, ondersteunende gemeenskap, waar ondersteuning veral in areas van belang aangebied word;

c) die gemeenskap verhoudings kan bou en fokus op die bou van ’n gemeenskapsidentiteit; en

d) professionele dienste aan die gemeenskap gelewer kan word.

’n Solidariteit Helpende Hand-vrywilliger is ’n persoon uit die gemeenskap wat hom- of haarself beskikbaar stel of wat aktief 'n taak, verantwoordelikheid of projek aanvaar sonder ’n beloning of vergoeding. 'n Helpende Hand-vrywilliger ontvang nie ’n salaris nie. ’n Vrywilliger is enige iemand wat sy tyd, hulp, kennis of kundigheid sonder vergoeding aanbied. Dit kan wees in reaksie op 'n versoek of deur die inisiatief te neem om self aan te klop.