Solidariteit Helpende Hand se missie is om gemeenskappe te aktiveer en selfsorg te bevorder. Met PlantSelf wil ons nie net armoede verlig nie, maar dit ook help verbreek en voorkom. Die fisiese bewerking van grond en die handeling om iets te plant, verander 'n mens se perspektief. Kortom: Sit jou hande in die grond, plant iets, en beleef die fisiese, emosionele en geestelike wonderwerk wanneer jy dit sien groei.
Solidariteit Helpende Hand besef dat dit terapeuties is om in die grond te werk. Deur ons passie vir grond en ons aangebore vaardigheid om grond te bewerk en te plant te benut, moedig ons gemeenskappe aan om hul eie voedsel te verbou en sodoende selfversorgend te word. PlantSelf verminder gemeenskappe se afhanklikheid van eksterne hulpbronne en gee hulle 'n gevoel van onafhanklikheid en vryheid.
Dié projek skep 'n gesonde omgewing waarin mense kan groei en hul eie potensiaal ontgin. Dit help hulle om hul waardigheid te herwin en om weer sin en 'n doel in die lewe te ontdek, daarom is dit geskik vir kinders, bejaardes, persone met gestremdhede en gesinne in nood.
Deur middel van die PlantSelf-projek wil ons mense bemagtig met kennis van landbou en tuinbou en met die praktiese vaardighede om self tuin te maak. Ons wil vir hulle basiese landboutegnieke, tuinbouvaardighede en bewaringsmetodes aanleer. Met dié kennis en vaardighede kan individue hul eie voedsel produseer en selfs aan die gemeenskap verskaf. Die projek moedig mense ook aan om mekaar te ondersteun deur hul kennis en hulpbronne met mekaar te deel en so 'n gemeenskapsgevoel op te bou. Ons leer mense om nie te sê: "Plant vir my." nie, maar "Ek plant self." Dis 'n klein begin, maar dit maak 'n reuseverskil.
Solidariteit Helpende Hand beskou samewerking en die bande wat dit in 'n gemeenskap smee as 'n sterk fondament vir die opbou van veerkragtige gemeenskappe. Met PlantSelf wil ons veerkragtige gemeenskappe help om selfonderhoudend te raak. Mense moenie net in hul eie behoeftes voorsien nie, maar mekaar ook in tye van nood ondersteun.
Dié inisiatief is 'n baken van hoop vir gemeenskappe wat voor die uitdaging van armoede te staan kom. Dit bewys dat 'n gemeenskap vir hulle 'n beter lewe kan bou en hoop vir die toekoms kan skep deur saam te werk en selfonderhoudend te wees. Hopelik sal dit ander laat besef dat elke individu 'n waardevolle bydrae kan lewer en hulle inspireer om ook betrokke te raak by gemeenskapsaktiwiteite en self te begin doen.
PlantSelf is die begin van 'n reis na ekonomiese onafhanklikheid, menswaardigheid en die verbetering van lewenskwaliteit. Dit is 'n oproep aan ons gemeenskap om saam te staan, saam te leer, saam te groei en mekaar te ondersteun. Met hierdie projek bied Solidariteit Helpende Hand aan gemeenskappe 'n bloudruk vir selfsorg en skep so hoop op 'n beter toekoms vir almal wat betrokke is.
Laat ons saam die aarde bewerk. Laat ons saam groei en saam bou aan 'n wat sterk, veerkragtige en selfonderhoudende gemeenskap.
PlantSelf, want ons plant self.